الفراخ

من عاداتنا دايما ان الوالدة لازم تاكل فراخ وفراخ وفراخ وكمان فراخ وجنبها فراخ و تحلى بفراخ مع عصير فراخ . وزى ماقلت قبل كدة اول ما رجعت من المستشفى حطولى فرخة كاملة عشان اكلها ولازم تخلصيها كلها , طب ازاى ؟ اذا كان وانا سليمة وبكامل لياقتى مش باقدر اكل غير ورك واحد بس , عايزينى دلوقتى اكل فرخة كاملة ؟! دا خيال علمى

 طبعا ما اكلتش غير ورك وماما قعدت تقول لى ازاى ؟ ماينفعش .. كملى .. تعالى على نفسك.
-يا ماما انا اكلت ورك واحد وماعدتش قادرة , تفتكرى لو غصبت على نفسى هاقدر اكمل الفرخة ؟
- طب كلى الصدر
- ماباحبش الصدر
- ليه ؟
- وحش
- واااااااااااء وااااااااااااء ( دا احمد طبعا )
- ماما : طب خلاص هاجيبلك تكملى بعد شوية
- أوك
- رضعيه بقة
- لا دا بيزعل لما ارضعه
- رضعيه حرام ...... ها أجيب الفرخة بقة ؟
- هو انا لحقت يا ماما ؟
- طيب
- احمد : واااااء وااااااء واااااااااااء
- انا : هووووووووه هووووووووووه هووووووووه
- واااااااء واااااااااء وااااااااء
- طب مم
- واااااااااااء
- طب ننه
- واااااااااء
- اعملك ايه يعنى ؟ عايز ايه ؟ بتعيط ليه ؟
- ايه يا دينا بتزعقيله ليه ؟
- غلس ورخم ونكدى
- نونو يا دينا 
- لأ مش نونو .. دا عو .. وحش مخيف متنكر فى شكل نونو
- نونو يا دينا
- ءاااااااااااااء انا الجبته لنفسى أعمل اييييييييه ؟
- كلى بقيت الفرخة
- كده هايرجع ؟
- هههه يرجع ايه ؟ انتى لازم تتغذى
- لاااااااااااااا

حاولت ارضعه رضع شوية ونام وصحى بعد ربع ساعة ورجع يعيط . رضعته ونيمته وحاولت انام وانا شايلاه مش مشكلة المهم انام انااااااااااااااااااااام

- تررررن ترررررررررررررن
- واااااااااااء واااااااااااء واااااااااااااااء
- ماما : ألو
- ألو .. ازيك يا ميرفت .. ادينى دينا اما اباركلها
- ماما : خدى كلمى عمتك
- انا : الو اهلا يا طنط ازيك
- طنط : مبروك يا حبيبتى عاملة ايه دلوقتى
- الحمد لله
- والنونو ؟
- كويس
- امال بيعيط ليه ؟ رضعيه
- حاضر
- مع السلامة
حاولت انيمه تانى هووووووووه هوووووووووه هوووووووووه
تررررررررررررررن تررررررررررررن ترررررررررررررن
- واااااااااااء وااااااااااااااء وااااااااااااااااء
- ماما : ألو 
-  الو ازيك يا ميرفت , ادينى دينا اتطمن عليها
- الو .. اهلا يا طنط
- ازيك يا حبيبتى مبروك
- ميرسى
- هو النونو بيعيط ليه ؟ اكيد مجوعاه هههههه .. رضعيه
- حاضر ( لو كانت الرضاعه هى الحل ماكانش حد غلب )
- مع السلامة

انيمه بقة .. هووووووووووه هووووووه هووووووووووه
ترررررررررررررن تررررررررررن ترررررررررررررن
- وااااااء وااااااااااء وااااااااااء
- ماما : الو
- الو يا طنط ادينى دينا اباركلها
- كلمى يا دينا صاحبتك داليا
- الو اهلا داليا
- مبروك يا قمر ازيك دلوقتى
- الحمد لله
- والنونو ؟
- اهئ .. كوي .. اهئ .. يس
- بتعيطى ليه ؟
- مش .. اهئ .. با عيط
- شكلى باتكلم  فوقت مش مناسب اسيبك دلوقتى باى
ماما احرقى التليفون من فضلك
ماما : اجيبلك الفرخة تكمليها ؟
لأ
من غير ما اطول عليكم تانى يوم ماما جابتلى فرخة اكلها وتالت يوم والرابع والخامس الخخخخخخخخخخخخخخخخخخخخخخخخ
لحد ما نفذ صبرى , قلتلها :
- مش عايزة فراخ .. مش واكلة فراخ
- امال عايزة ايه ؟
- عايزة عصير قصب
- عصير قصب !!
- كتيييير 10 لتر
- طب روح يا سامى هاتلها عصير قصب , وبعد كده تاكلى الفرخة
- هو ايه سر الفراخ ؟
- هو كده انتى دكتورة وفاهمة
- ماهو عشان انا دكتورة مش فاهمة , فهمينى
- هو احنا نعرف كده بيقولوا الوالدة بعد ماتولد لازم تحط فبطنها فرخة
- ههههه دى كريمة مختار القالت كده فى فيلم الحفيد , دى كانت بتمثل والله يا ماما مش بجد
و افتكرت انها اقتنعت بكلامى لكن هيهات هههههه برضه كملت كورس الفراخ لما طلعلى ريش

-

هارجعه

بدأت حكايتى مع الزمان ، قصدى حكايتى مع العيال من اول لحظة ميلاد لابنى احمد
ما بطلش عياط وصريخ من ساعة ماتولد من قبل حتى ما يخرج من العمليات وماما كانت سامعة صوته من اخر الطرقة وااااء وااااااء واااااااااء وكأنه كان مبسوط جوة وزعلان اننا طلعناه للدنيا
ماما شالته من الممرضة وخدته فحضنها وماسابتهوش خالص ، طبعا ماهو اول حفيد

البيه بقة كان مشكلة ، مش راضى ياخد جلوكوز على ما افوق من البنج وكل ما يحطوله بالسرنجة فى بقه جلوكوز يتفه
فلما فوقت حاولت ارضعه ماعرفش يرضع ،اما بالنسبة لكل الكلام ال سمعته قبل كده عن الفطرة وان البيبى بيتولد عارف ازاى يرضع فلا ينطبق بتاتا مطلقا على حالة احمد .. لقد اثبت عبقرية فذة وتميزا ملحوظا من اول يوم .. وهايفضل متميز طول عمره زى ماهتشوفوا

 
واخدت انطباع من اولها .. انا الجبته لنفسى
والانطباع اثبت صحته , فعلا كمل عياط طول اليوم .. وطول الليل .. وطول النهار فى اليوم التالى .. و.. .. وروحنا عند ماما لأن الولادة كانت قيصرية وطبعا هو كان مكمل عياط عادى امال هو جه الدنيا يعمل ايه ؟

 
    بعد ما انفض المولد و الأمن استتب وسامر روح جت الفرخة طبعا وقال ايه لازم تاكليها كلها " الفراخ دى ليها قصة لوحدها هانتكلم فيها باستفاضة "
طبعا ماكانش عندى نفس اكل حاجة خالص

انااااااااااااااااااااام ؟ هههههههه
مش ممكن طبعا مافيش نوم قبل اول سنة . اه والله ، قعدت اعلمه يرضع .. ابدا , طب انيمه .. لا يمكن وواصل بإصرار مهمته فى الحياة .. العيااااااااااااااط

لاحظوا ان دى كانت اول مرة اشوف فيها بيبى على الطبيعة واحب ابشر المش عارفة الاطفال على الطبيعة حاجة تانية خاااااااااااالص 

واقبل الليل … ثم ادبر والساعة بقت 3 صباحا والبيه لسة بيعيط بقاله يوم ونص الله ينور ويطرح فيه البركة , وانا تعبانة وعايزة اناااام , الناس لما بيعملوا عملية بيناموا بعدها مش بيدخلوا الموريستان . كل ما انام يعيط اقوم تانى وطبعا انا مش قادرة انام واقوم وباتوجع كل ما اتحرك , فى الاخر فضلت قاعدة وشايلاه ارحم
تعبت وجبت آخرى ،فى الاخر الساعة ٣ بالليل شخطت فيه :
" انت ايييييه ؟ مابتتعبش ؟ اسكتتتت خاااااالص .. لو ماسكتش هارجعك "
وقعدت افكر مع نفسى :

انا ايه ال عملته فى نفسى ده ؟ مانا كنت عايشة و مبسوطة اجيب عيال ليه ؟ ثم ان انا لسةصغيرة,حد يتجوز اول ما يتخرج ؟!! حد يتجوز اساسا !!!!!
كان بدرى عليا .. عليا بدرى
قطع افكارى ابن المحتاسة وااااااااااااااااااااااااااء

• اخرس خالص .. اهئ اهئ ءاااااااااااااااااااااااااااااااااااااااااااااااااااااء ( دا انا باعيط من حوستى )
• ماما : مالك يا دينا ؟
• ماماااااااااااااا عايزة ارجع الواد داااااااااااااا
• ت ..!! هههههههه ترجعيه ازاى بقه ؟
• وانا مالى بقة ماليش دعوة عايزة ارجعوووووووووووووووو
• احمد : واااااااااااااااااااء واااااااااااء واءواءوااااااااااااء
• انا : شفتى اهو عايز يرجع اهو 
• يرجع ازاى ؟
• انا بطنى لسه مفتوحة نرجعه ونقفل عليه ونمشى ٩ شهور بالعكس
• ههههههههههه

مقدمة

وااااااااااااااء ... واااااااااااااااء ... وااااااااااااء

• اه اه اه .. سامر هو انا خلاص ولدت
• ايوة .. حمد لله على السلامة
• عايزة اشوفه
• حاضر .. اهه شوفى شبهك اوى
• ابتسمت وغمضت عينيا وقلت : عايزة مسكن
• وااااااااااااااااااااء واااااااااااااااء وووووواااااااااااااااء

ومن هنا ابتدا ابتدا ابتداااااااااااااا ابتدا المشوار

وأه يا خوفى .......